Read Psalms chapter 96 in Cebuano on Bible for Hope.
1 Oh pag-awit alang kang Yahweh ug usa ka bag-ong alawiton: Manag-awit kamo alang kang Yahweh, tibook nga yuta.
2 Manag-awit kamo alang kang Yahweh, dayegon ninyo ang iyang ngalan; Imantala ang iyang kaluwasan sa adlaw-adlaw.
3 Ipahayag ang iyang himaya sa taliwala sa mga nasud, Sa taliwala sa tanang mga katawohan ang iyang mga katingalahang buhat.
4 Kay daku si Yahweh, ug takus sa labing daku nga pagdayeg: Siya takus pagakahadlokan ibabaw sa tanang mga dios.
5 Kay ang tanang mga dios sa mga katawohan mga larawan man; Apan si Yahweh nagbuhat sa kalangitan.
6 Kadungganan ug kahalangdon anaa sa atubangan niya; Kalig-on ug katahum anaa sa iyang balaan nga puloy-anan.
7 Ihatag ninyo kang Yahweh, Oh kamong mga kaubanan sa mga katawohan, Ipahanungod ngadto kang Yahweh himaya ug kusog.
8 Ipahanungod ngadto kang Yahweh ang himaya nga angay sa iyang ngalan: Pagdala ug halad, ug dumuol ngadto sa iyang mga sawang.
9 Oh managsimba kamo kang Yahweh sa katahum sa pagkabalaan: Managkurog sa atubangan niya, tibook nga yuta.
10 Isugilon sa taliwala sa mga nasud: si Yahweh nagahari: Ang kalibutan usab natukod nga kini dili matarug: Pagahukman niya ang mga katawohan sa katul-id.
11 Papaglipaya ang kalangitan, papagmayaa ang yuta; Padahunoga ang dagat, ug ang pagkapuno niana;
12 Pabayawa ang kapatagan, ug ang tanan nga anaa kaniya; Unya ang tanang kakahoyan sa lasang manag-awit sa kalipay
13 Sa atubangan ni Yahweh; kay moabut na siya, Kay siya moanhi sa paghukom sa yuta: Pagahukman niya ang kalibutan uban ang pagkamatarung, Ug ang katawohan uban ang iyang kamatuoran.