Read Psalms chapter 34 in Cebuano on Bible for Hope.
1 Pagadayegon ko si Yahweh sa tanang mga panahon: Ang pagdayeg kaniya magakanunay sa akong baba.
2 Ang akong kalag magapangandak tungod kang Yahweh: Managpatalinghug niini ang mga maaghup, ug managkalipay sila.
3 Oh padakuon ninyo si Yahweh uban kanako, Ug usahan ta ang pagbayaw sa iyang ngalan.
4 Gipangita ko si Yahweh, ug gitubag niya ako, Ug giluwas niya ako gikan sa tanan ko nga mga kahadlok.
5 Nanagtutuk sila kaniya, ug gihayagan sila; Ug ang ilang mga nawong dili gayud maulawan.
6 Kining kabus nga tawo nagtu-aw, ug gipatalinghugan siya ni Yahweh, Ug giluwas siya gikan sa tanang mga kalisdanan niya.
7 Ang manolonda ni Yahweh magapahaluna sa paglibut sa mga nangahadlok kaniya, Ug magaluwas kanila.
8 Oh tilawi ug tan-awa ninyo nga si Yahweh maayo: Bulahan ang tawo nga modangup kaniya.
9 Pangahadlok kamo kang Yahweh, Oh kamong mga balaan niya; Kay sa mga nangahadlok kaniya wala ing makulang.
10 Ang mga magagmay nga leon makulangan, ug nag-antus sa kagutom; Apan ang mga nagapangita kang Yahweh dili makulangan sa bisan unsang butang nga maayo.
11 Umari kamo, mga anak, patalinghug kamo kanako: Ang pagkahadlok kang Yahweh igatudlo ko kaninyo.
12 Kinsa ba ang tawo nga magatinguha ug kinabuhi, Ug mahagugma sa daghang mga adlaw, aron makita niya ang maayo?
13 Bantayi ang imong dila gikan sa dautan, Ug ang imong ngabil gikan sa pagsulti ug limbong.
14 Pahalayo ka gikan sa dautan, ug buhaton mo ang maayo; Pangitaon mo ang pakigdait, ug sundon mo kini.
15 Ang mga mata ni Yahweh anaa sa ibabaw sa mga matarung, Ug nagapatalinghug ang iyang mga igdulungog sa ilang pagtu-aw.
16 Ang nawong ni Yahweh batok sa mga nagabuhat ug dautan, Aron sa pagputol sa handumanan nila gikan sa yuta.
17 Nanagtu-aw ang mga matarung, ug nagpatalinghug si Yahweh, Ug nagluwas kanila gikan sa tanan nilang mga kalisdanan.
18 Si Yahweh haduol niadtong mga dugmok ug kasingkasing, Ug nagaluwas siya niadtong mahinulsulon sa espiritu.
19 Daghan ang mga kagul-anan sa matarung; Apan si Yahweh magaluwas kaniya gikan kanilang tanan.
20 Siya nagabantay sa tanan niyang mga bukog: Walay usa kanila nga madugmok.
21 Ang dautan magapatay sa dautan; Ug ang nagadumot sa tawong matarung pagahukman sa silot.
22 Si Yahweh nagatubos sa kalag sa iyang mga ulipon; Ug walay mausa sa modangup kaniya nga pagahukman sa silot.