Read Psalms chapter 27 in Cebuano on Bible for Hope.
1 Si Yahweh mao ang akong kahayag ug ang akong kaluwasan; Kinsa man ang akong pagakahadlokan? Si Yahweh mao ang kusog sa akong kinabuhi; Kang kinsa man ako malisang?
2 Sa diha nga nagtigum batok kanako ang mga mamumuhat sa kadautan sa pagkaon sa akong unod, Bisan ang akong mga kabatok ug mga kaaway, sila nanghipangdol ug nangapukan.
3 Bisan ang usa ka dakung panon magapahamutang batok kanako, Dili mahadlok ang akong kasingkasing: Bisan ang gubat patindogon batok kanako, Bisan pa niini ako masaligon.
4 Usa ka butang ang gipangayo ko kang Yahweh, nga pagapangitaon Ko: Nga makapuyo ako sa balay ni Yahweh sa tanang mga adlaw sa akong kinabuhi, Aron sa pagtan-aw sa katahum ni Yahweh. Ug sa pagpakisayud sa iyang templo.
5 Kay sa adlaw sa kasamok pagatagoan niya ako sa iyang puloyanan: Diha sa tabil sa iyang balongbalong pagatagoan niya ako; Ituboy niya ako sa ibabaw sa usa ka bato.
6 Ug karon pagabayawon ang ulo ko sa ibabaw sa akong mga kaaway nga nagalibut kanako; Ug magahalad ako diha sa iyang balong-balong, mga halad sa kalipay; Ako magaawit, oo, magaawit ako ug mga pagdayeg ngadto kang Yahweh.
7 Magpatalinghug ka, Oh Yahweh, kong magatu-aw ako uban sa akong tingog: Malooy ka usab kanako, ug tubagon mo ako.
8 Sa diha nga ikaw moingon: Pangitaa ninyo ang akong nawong; ang akong kasingkasing miingon kanimo. Ang nawong nimo, Oh Yahweh, ang pagapangitaon ko.
9 Ayaw pagtagoa ang imong nawong gikan kanako; Ayaw pag-isalikway ang imong ulipon sa kaligutgut: Ikaw mao ang akong panabang; Ayaw ako pag-itukmod, ayaw pagbiyai, Oh Dios sa akong kaluwasan.
10 Kong ako pagabiyaan sa akong amahan ug sa akong inahan, Unya si Yahweh ang magadawat kanako.
11 Tudloi ako sa imong dalan, Oh Yahweh; Ug mandoi ako sa alagianan nga matul-id, Tungod sa akong mga kaaway.
12 Dili mo ako itugyan sa kabubuton sa akong mga kabatok: Kay ang mga saksi nga bakakon nanindog batok kanako, Ug ingon man ang mga nanagpangusmo ug kabangis.
13 Napunawan unta ako, kong wala pa akoy pagtoo sa pagtan-aw sa kaayo ni Yahweh Sa yuta sa mga buhi.
14 Maghulat ka kang Yahweh: Magmalig-on ka, ug paisugon mo ang imong kasingkasing; Oo, maghulat ka kang Yahweh.