Read Psalms chapter 118 in Cebuano on Bible for Hope.
1 Oh paghatag kamo ug mga pasalamat kang Yahweh; kay siya maayo man; Kay ang iyang mahigugmaong-kalolot nagapadayon sa walay katapusan.
2 Ipaingon sa Israel karon, Nga ang iyang mahigugmaong-kalolot nagapadayon sa walay katapusan.
3 Karon ipaingon sa panimalay ni Aaron, Nga ang iyang mahigugmaong-kalolot nagapadayon sa walay katapusan.
4 Ipaingon karon kanila nga nangahadlok kang Yahweh, Nga ang iyang mahigugmaong-kalolot nagapadayon sa walay kapusan.
5 Gikan sa akong kalisdanan misangpit ako kang Yahweh: Mitubag si Yahweh kanako ug iyang gibutang ako sa dapit nga halapad.
6 Si Yahweh kadapig nako; dili ako mahadlok: Unsay arang mabuhat sa tawo kanako?
7 Si Yahweh kadapig nako sa taliwala sa mga nagatabang kanako: Busa makita ko ang akong tinguha diha sa ibabaw kanila nga nanagdumot kanako.
8 Labing maayo ang pagdangup kang Yahweh Kay sa pagsalig diha sa tawo.
9 Labing maayo ang pagdangup kang Yahweh Kay sa pagbutang sa atong pagsalig diha sa mga principe.
10 Ang tanang mga nasud nanaglibut kanako: Sa ngalan ni Yahweh akong pagaputlon sila.
11 Nanaglikos sila kanako; oo, ilang gilibutan ako: Sa ngalan ni Yahweh akong pagawagtangon sila.
12 Nanaglikos sila kanako sama sa mga putyokan; sila gipalong ingon sa kalayo sa mga tunok: Sa ngalan ni Yahweh akong pagaputlon sila.
13 Sa kalit imong gitukmod ako aron nga ako mapukan; Apan si Yahweh mitabang kanako.
14 Si Yahweh mao ang akong kalig-on ug ang akong alawiton; Ug siya mao ang akong kaluwasan.
15 Ang tingog sa kalipay ug sa kaluwasan anaa sa mga balong-balong sa mga matarung: Ang toong kamot ni Yahweh nagabuhat nga maisugon.
16 Ang toong kamot ni Yahweh nabayaw: Ang toong kamot ni Yahweh nagabuhat nga maisugon.
17 Dili ako mamatay, kondili mabuhi ako. Ug igapahayag ko ang mga buhat ni Yahweh.
18 Gicastigo ako ni Yahweh sa masakit gayud; Apan ako wala niya itugyan ngadto sa kamatayon.
19 Buksi kanako ang mga ganghaan sa pagkamatarung: Mosulod ako kanila, magapasalamat ako kang Yahweh.
20 Mao kini ang ganghaan ni Yahweh; Niini mosulod ang mga matarung.
21 Pagapasalamatan ko ikaw; kay gipatalinghugan mo ako, Ug ikaw nahimong akong kaluwasan.
22 Ang bato nga gisalikway sa mga magtutukod Nahimo nga pangulo sa pamag-ang.
23 Mao kini ang buhat ni Yahweh; Kini maoy katingalahan sa among mga mata.
24 Kini mao ang adlaw nga gibuhat ni Yahweh; Niini managmaya ug managkalipay kita.
25 Luwasa karon, kanimo nangamuyo kami, Oh Yahweh: Oh Yahweh, kanimo nangamuyo kami, ipadala ang kauswagan karon.
26 Bulahan siya nga moanhi sa ngalan ni Yahweh: Gikan sa balay ni Yahweh kami nanagdayeg kanimo.
27 Si Yahweh mao ang Dios, ug siya naghatag kanato ug kahayag: Bangana ang halad sa mga linubid, bisan ngadto sa mga sungay sa halaran.
28 Ikaw mao ang akong Dios, ug kanimo magapasalamat ako: Ikaw mao ang akong Dios, igapahitaas ko ikaw.
29 Oh managpasalamat kamo kang Yahweh; kay siya maayo man; Kay ang iyang mahigugmaong-kalolot nagapadayon sa walay katapusan.