Read Psalms chapter 116 in Cebuano on Bible for Hope.
1 Nahagugma ako kang Yahweh, kay siya nagapatalinghug Sa akong tingog ug sa akong mga pangaliyupo.
2 Tungod kay iyang gikiling kanako ang iyang igdulungog, Busa magatawag ako kaniya samtang ako buhi pa.
3 Ginalikusan ako sa mga talikala sa kamatayon, ug ang kasakit sa Sheol minggapusa kanako: Ang kaguol ug kasakit maoy hingpalgan ko.
4 Unya gisangpit ko ang ngalan ni Yahweh: Oh Yahweh, luwasa ang akong kalag, nangamuyo ako kanimo.
5 Puno sa gracia si Yahweh, ug matarung; Oo, maloloy-on ang atong Dios.
6 Si Yahweh nagabantay sa mga walay-pagtagad: Gipaubos ako, ug iyang giluwas ako.
7 Bumalik ka sa imong kapahulayan, Oh kalag ko; Kay si Yahweh nagpanalangin sa madagayaon gayud kanimo.
8 Kay imong giluwas ang akong kalag gikan sa kamatayon, Ang akong mga mata gikan sa mga luha, Ug ang akong mga tiil gikan sa pagkahidalin-as.
9 Magalakaw ako sa atubangan ni Yahweh Sa yuta sa mga buhi.
10 Ako motoo, kay mosulti ako: Gisakit ako sa hilabihan gayud:
11 Sa hinanali ako nakaingon: Ang tanang tawo mga bakakon.
12 Unsa man ang akong igabayad kang Yahweh Tungod sa tanan niyang mga kaayohan kanako?
13 Dawaton ko ang copa sa kaluwasan, Ug pagasangpiton ko ang ngalan ni Yahweh.
14 Magabayad ako sa akong mga panaad kang Yahweh, Oo, diha sa atubangan sa tanan niyang katawohan.
15 Hamili sa pagtan-aw ni Yahweh Ang kamatayon sa iyang mga balaan.
16 Oh Yahweh, sa pagkamatuod ako mao ang imong alagad: Ako mao ang imong alagad, ang anak nga lalake sa imong alagad nga babaye; Gihubad mo ang akong mga talikala.
17 Akong ihalad kanimo ang halad-sa-pasalamat, Ug sangpiton ko ang ngalan ni Yahweh.
18 Kang Yahweh magabayad ako sa akong mga panaad, Oo, diha sa atubangan sa tanan niyang katawohan,
19 Sa mga sawang sa balay ni Yahweh, Sa kinataliwad-an mo, Oh Jerusalem. Dayegon ninyo si Yahweh.